「草皮殺手」阿古路缺陣
英超周中開快車，周三凌晨先有聯賽榜3哥曼城作客鬥般尼；曼城現時落後利物浦11分，要保持爭標機會已經再無失分空間，不過哥迪奧拿對上3次領軍出戰般尼都踢得唔輕鬆，今場仲要冇埋「草皮殺手」阿古路，曼城讓球半、兩球制唔過，波童建議捧下盤。
（Now 621周三凌晨4時15分直播）
自從哥迪奧拿喺16/17球季開始擔任曼城領隊以來，除咗最怕作客利物浦嘅晏菲路球場（聯賽4次作客1和3負），紐卡素嘅聖占士公園球場（聯賽3次作客1勝1和1負）同般尼嘅草皮球場（聯賽3次作客2勝1和）都唔多旺佢，咁啱曼城近3場作客聯賽對手正正就係呢3隊，連場失分似乎有迹可尋。
哥迪奧拿3征般尼全輸盤
單睇數據，哥迪奧拿3次作客般尼未輸過表面上唔錯，但其實2次贏波分別只係小勝1比0及2比1，過程絕對唔輕鬆，而且呢2場勝仗嘅3個入波，全部都由阿古路包辦，呢名阿根廷前鋒喺對車路士嘅比賽中傷出，如無意外會繼續缺陣，哥迪奧拿焗用加比爾捷西斯攻堅。有睇上場對紐卡素嘅朋友應該會認同，如果唔係加比爾捷西斯把握力差，曼城絕對有權早早領先2、3球，就算史達寧、奇雲迪布尼狀態幾咁弗，前線有呢名「敗家仔」喺度，始終畀唔到人大勝信心，加上球隊上場兩次領先都係短時間之內被追和，後防集中力明顯有問題，想保持清白身真係唔容易。
般尼上周末主場淨吞水晶宮兩蛋，連贏2場後終於輸波，不過睇番整場表現般尼並冇走樣，射門次數及控球比率都勝過對手，相信對信心影響不大。般尼今季聯賽3次鬥Big6雖然全部輸晒，但喺車路士、阿仙奴身上一共攞到3個入波，而且作客狀態大勇嘅李斯特城都係僅輸1比2，並非冇還擊之力，如以今場曼城讓球半、兩球盤口去計，般尼對上3次主場鬥曼城全部贏盤，以曼城近期表現，呢個下盤絕對值博。