近日足壇最爆新聞，梗係阿仙奴主帥艾美利被豉椒炒魷。畢竟連同各項賽事，兵工廠已經連續7場不勝（5和2負），包括日前歐霸盃領先之下，竟遭法蘭克福翻盤反輸1比2，如此劣績，同呢支傳統勁旅嘅威名、身價毫不相稱，艾帥被炒確實無話可說。
2018年，執教22載嘅阿仙奴傳奇主帥雲格「被分手」，高層選擇咗艾美利做接班人，對於呢位剛於巴黎聖日耳門失意嘅西班牙教頭嚟講，既係機遇，亦係一大考驗，因為雲格喺兵工廠最後歲月累積唔少問題，所以艾帥上季未能領軍殺入聯賽前4、歐霸盃決賽失利，某程度係可以理解。
今季阿仙奴老闆肯科水買人，其中新兵尼高拉斯比比身價極高，預備晒優質「食材」，只待艾美利點樣「烹調」，可惜佢實在亂點鴛鴦，排陣愈排愈亂，4231、433、3412、343等陣式全部試晒，搞到球員無所適從，昔日「雲爺爺」被批評一成不變，艾美利則走上另一極端。除此之外，主帥能否團結球員同心賣命，有時比高明戰術更重要，可惜艾美利連呢點都做唔到，難怪近期眾將踢到士無鬥志，便知艾帥「命不久矣」。
講番今晚英超，阿仙奴作客猶如不設防嘅諾域治，絕對係接替艾帥嘅看管領隊龍格保最佳起跑線，我認為呢位名宿可藉威望提升士氣，有力贏波重上正軌。