周一凌晨英超大戰，李斯特城主場鬥愛華頓。「狐狸」自主帥羅渣士接手後，強隊氣質愈來愈明顯，加上有腳風大順嘅頭號射手「華Dee」占美華迪壓陣，搶分能力一流，對住狀態飄忽嘅「拖肥糖」，李城有望再下一城，一於強捧主勝。
（Now 622周一凌晨零時30分直播）
李城近年喺轉會窗精明操作，為球隊源源不絕注入如蘇恩古同泰利文斯等高質新血，加上前利物浦主帥羅渣士，自上季季中由些路迪轉教李斯特城後，成功令這支昔日靠防守反擊揾食嘅球隊轉型，加入傳控同壓迫元素，每當李城失去控球權時，前場5人即進行反搶，其中占士麥迪臣、泰利文斯、哈維班尼斯等猛將活力十足，高壓式踢法經常令對手無所適從，場上表現愈嚟愈有強隊氣質。此外羅帥亦充分利用老臣嘅經驗，其中功勳老將占美華迪腳風大順，今季聯賽已累積轟入12球，高踞射手榜前列，計埋盃賽，呢位32歲射手近6場轟入7球，助李城豪取6連勝，其中5次更贏2球或以上，一躍成為聯賽2哥。
愛華頓訪李城5連敗
相反愛華頓近年雖然喺轉會市場大灑金錢，可惜球隊表現並沒因此得益，今季「拖肥糖」狀態持續低迷，近9場聯賽只得2勝1和6負，包括上場主場淨吞弱旅諾域治兩蛋，喺積分榜同降班區愈行愈近，有傳高層已對主帥馬高施華失去信心，想斟莫耶斯回巢救亡，如今傳出其帥位不穩的消息，隨時令軍心更不穩，對住近5場聯賽主場全勝嘅李城，隨時凶多吉少，一於捧主勝。