周三凌晨歐聯A組第5輪上演豪門對決，皇家馬德里主場鬥巴黎聖日耳門。皇馬呢場贏波就出線，目標明確鬥志高昂，不過PSG兩大球星基利安麥巴比同尼馬已經傷愈復出，攻力絕對唔嘢小，兩軍近年交手頻頻開大，呢場中位數2.5球入球大值得再追。
（Now 645、有線603及604台周三凌晨4時直播）
賓施馬歐聯已入62球
皇馬今屆歐聯分組賽出閘脫腳，好彩近2仗表現回勇，主客2仗雙殺加拉塔沙雷，即刻於積分榜躍升至次席，已經拋開第3位布魯日5分，呢場皇馬只要贏波，就可以提前一輪確保淘汰賽席位，更有機會衝擊小組首名。上輪梅開二度嘅頭號射手賓施馬，個人已經累積62個歐聯士哥，僅次C朗、美斯同魯爾，進佔歐聯史上射手榜「4哥」位置，呢位法國前鋒上仗聯賽再有斬獲，帶領皇馬以3比1擊敗皇家蘇斯達，呢場繼續夥拍夏薩特同巴西小將洛迪高高斯，「銀河艦隊」攻力有保證。
麥巴比尼馬復出爭功
PSG同樣當弗，今屆歐聯分組賽至今4戰全勝兼狂轟10球，近期頻頻有波入嘅莫路伊卡迪同迪馬利亞呢對阿根廷雙子今場隨時候命，仲有基利安麥巴比同尼馬兩大攻擊手傷愈復出，PSG火力將進一步提升。雖然聖日耳門已經穩奪16強出線資格，呢場只要唔輸波就可以保住小組首名，不過PSG一向重攻輕守，要轉踢守勢波實在難為咗佢哋，既然兩軍近4次交手全開3球或以上，不如繼續向中位數2.5球入球大埋手。