摩連奴主場處子戰
歐聯B組重頭戲，熱刺主場迎戰希臘代表奧林比亞高斯。熱刺新帥摩連奴上場首度領軍即有好開始，今次返地頭上演主場處子騷更加唔衰得，而且熱刺只要贏波便可鎖定16強席位，爭勝決心十足；奧林比亞高斯對上9次歐聯作客英超球隊輸8次，當中7次輸2球或以上，熱刺讓球半、兩球照捧上盤。（myTV Gold 303、Now 643、有線616及656台周三凌晨4時直播）
目前B組形勢，拜仁慕尼黑4戰全勝已篤定出線，熱刺得7分排第2，領先第3位嘅貝爾格萊德紅星4分，熱刺今場贏波就唔使理會其他戰果肯定躋身16強，如果和波而另一邊廂紅星擊敗拜仁，熱刺最後一場作客拜仁至少要攞1分先確保出線；奧林比亞高斯雖然排包尾，但只要佢哋贏晒最後2場，然後熱刺下場輸畀拜仁，奧林比亞高斯就可憑較佳對賽反壓熱刺次名出線，數字上仲未斷氣。
熱刺上周辭退主帥普捷天奴後，改由「寸王」摩連奴接手，「寸王」上場首次領軍即以3比2擊敗韋斯咸，取得球隊自今年1月以來、近12場作客聯賽首次勝利，今場係「寸王」上任後首場主場賽事，當然希望乘勝追擊。同普捷天奴離隊前相比，「寸王」嘅正選陣容最大分別係重召前英格蘭國腳艾歷迪亞，與新貴哈利雲克斯擔任雙防中，另棄用今季缺態嘅基斯甸艾歷臣，改用迪利阿里出任中場鎖匙人，上屆打入歐聯決賽最大功臣盧卡斯莫拉亦獲得重用，與孫興民做成「雙翼齊飛」，中場分工相對清晰，令攻守效率大大提高。
奧軍歐聯征英9戰8負
奧林比亞高斯首輪分組賽曾於主場逼和熱刺2比2，不過之後連輸3場，論實力似乎係呢組最弱嗰隊，而且奧林比亞高斯向來作客腳軟，除近6場歐聯分組賽作客全敗，對上9次歐聯作客英格蘭球隊更錄得1勝8負，其中7次輸2球或以上；熱刺對韋斯咸領先3球輸番2球，表現唔完美但可接受，而且有改善空間，吸取上場教訓，相信一眾後防更會打醒十二分精神，讓球半、兩球照撐上盤。