羅渣士續約專心衝冠
英超「2哥」李斯特城於周日晚登場，作客中下游分子阿士東維拉。李城今季狀態弗爆愈踢愈有，一躍成為聯賽前列分子，同「狐狸」作客表現出色不無關係，呢輪面對近期防線穿窿嘅維拉，絕對有力反客為主，客勝唔好錯過。
（Now 621周日晚上10時直播）
上季尾由蘇超些路迪過檔接掌李斯特城嘅羅渣士，成功將控球在腳的踢法注入「狐狸」戰術當中，為球隊今季英超取得佳績作出重大貢獻。有見及此，李城會方近期都果斷同羅帥續約至2025年，長留呢位名帥。現時李城暫列積分榜次席，落後「1哥」利物浦8分，大有機會取得下屆歐聯席位之餘，仲未放棄繼2015/16奇迹奪冠之後，再次衝擊聯賽盟主寶座。事實上，李城最近表現銳不可當，由9月下旬擊敗熱刺計起，聯賽連盃賽12戰豪取11勝佳績，除了近8戰贏晒之餘，單計作客成績，除聯賽以1比2僅負利物浦之外，其餘5場客戰皆捷，合共狂轟20球、僅失過1球咁大把，有至今斬獲14球嘅射手榜「1哥」占美華迪壓陣，「狐狸」要搶分真係易過借火。
維拉攻不銳守不穩
至於今季重返英超嘅維拉，近10場聯賽取得3勝2和5負，表現算係不過不失，但其中只得1場能夠保住清白身，防守表現難言可靠，佢哋今夏重點引入嘅巴西前鋒韋斯利摩拉斯，雖然開季至今14場聯賽皆正選披甲，但合共只斬獲4球。維拉現時攻不銳、守不穩，要向氣勢如虹嘅李城搶分認真唔知死，強捧客勝。