周中嘅英超快車剛上演默西賽德郡打吡，利物浦以5比2擊敗愛華頓，穩守聯賽榜1哥位置。今個星期嘅英超賽事，亦會有另一場打吡戰爆發，就係今晚曼城主場迎戰曼聯。面對同市宿敵曼聯，再無失分空間嘅「藍月亮」，今場將會搏盡搶分。
拉舒福特腳風順
曼聯周中英超憑拉舒福特梅開二度，主場以2比1擊敗熱刺，排名回升至聯賽榜第6位。呢位紅魔射手近況不錯，喺各項賽事近13場共取得12個入球，今季對Big 6球隊4場賽事中，更交出5個入球及1個助攻，令曼聯今季對Big 6暫時保持不敗。不過紅魔作客成績不濟，對上11場英超作客賽事只得1勝4和6負，只有對諾域治能夠贏波，今場作客曼城球場絕對係一場硬仗。
曼城落後榜首利物浦11分，與排第2位嘅李斯特城都相差3分，佢哋上輪作客般尼大勝4比1，今場係曼市打呲，對球隊而言，絕對係延續士氣嘅重要賽事。雖然曼城近況不穩，近6場賽事只取得2勝3和1負，但主場成績仍然不俗，近6場主場賽事5勝1和。對上27場英超主場賽事，更加贏咗24場，一共射入81球，攻力強勁。主帥哥迪奧拿6次喺英超領軍面對曼聯，取得4勝1和1負，曼城亦於上季聯賽雙殺同市死敵，相信今仗會拚盡全力。