唔赦Big 6最叻穩守突擊
今晚英超上演曼市打吡，曼城主場迎戰曼聯。曼聯今季繼續唔爭氣，但每逢「打大佬」表現出奇地好，Big 6戰未嘗一敗，適逢曼城防線走樣，曼聯受讓球半/兩球捧得過。
（Now 621及611周日凌晨1時30分直播）
曼聯目前僅排第6位，落後榜首利物浦22分之多，領隊蘇斯克查帥位危在旦夕，好彩佢今季領軍對親強隊都有交代，聯賽加盃賽Big 6嗰5戰共取得3勝2和佳績，以其一貫穩守突擊泊大巴戰術，今仗對曼城唔係話完全冇得打。
曼城防守走樣讓唔起
事實上，「紅魔」今季重用一班新秀打江山，經驗係輸蝕，亦冇強攻對手本錢，但嗰種快速反擊打法對強隊係有一定效果。「福仔」拉舒福特近9仗為曼聯上陣射入10球，直頭要頒個獎畀佢，周中對熱刺全靠佢梅開二度先全取3分。
反觀「藍月亮」曼城今季表現明顯較上季跌Watt，目前落後利物浦11分，連領隊哥迪奧拿都長他人志氣，話爭標機會渺茫，以往佢哋穩定性好高，對弱隊永遠十拿九穩，點知今季對諾域治、紐卡素先後失手，防守明顯出現漏洞。
睇番曼城上季全季聯賽只係失咗23球，但今季聯賽踢咗一半未夠已失咗17球，其中費蘭甸奴移後打中堅，由根度簡踢中場，好多人都認為效果唔理想，今場隨時又畀「福仔」偷襲得手，讓到球半/兩球實在太辣，寧敲遇強愈強嘅曼聯下盤。