本周德甲壓軸戲，雲達不來梅主場對柏達邦，榜尾柏達邦近期默默耕耘努力自強，陣上表現每場都有進步，為博奇迹護級已豁出去，勢同主隊鬥攻，黑柴推介中位數3.5球大盤。
（Now 670、FOX+、有線651及611台周一凌晨1時直播）
柏達邦窮到冇朋友，人哋升班例必開庫擴軍，佢哋仲要削減開支，今夏將兩大升班功臣，加納進攻中場迪克比堤，同上季首席射手菲臘基文特賣走，收番500萬歐元轉會費，但冇使過一分一毫買人，只以借用或免簽形式搵咗大批失意軍人頂檔，結果開季頭8場聯賽只得1分，教練史堤芬包姆加特不斷試用唔用球員，而且堅持開波即搶逼同進攻，去到10月底終於贏到杜塞爾多夫開齋，贏咗波之後全隊信心明顯提升，近兩輪先作客神奇賽和多蒙特，上仗迎戰另一勁旅RB萊比錫更喺開賽冇耐落後3球劣勢下，力追至僅負2比3，連一向弱項嘅耐戰力都有所加強，喺呢兩支勁旅身上合共入到5球，前線仲踢起咗高速高效嘅麥巴，令包姆加特相信喺德甲對任何球隊都有得踢，今晚作客遇上不來梅牌面雖然仲係下風，但要憑反擊入波絕對唔難。
雙方攻強守弱鬥入波
主隊雲達不來梅教練高菲特亦一直堅持進攻，呢位深受各界好評同球員愛戴嘅少帥，早前因為成績問題備受壓力，事實上不來梅一直受傷兵問題困擾，防線不穩又連仗失運，早前經歷過兩個半月8戰不勝逆境，直至上輪北部打吡作客禾夫斯堡，至憑將士用命同科索沃小將拉斯卡爆發，贏番場救命波，全隊士氣大振，不來梅向來攻強守弱，今季13輪聯賽有12場總入球3球或以上，近5輪有4場總入球達4球或以上，遇上今季6場作客共失15球嘅柏達邦，好易再開入球騷。