王者戰唔輸４球就掂
日職周六煞科，聯賽榜「1哥」橫濱水手與排第2嘅ＦＣ東京上演冠軍對決。主場出擊嘅水手只要唔淨輸多過3球便可封王，定必先穩守再謀後動；ＦＣ東京連續2場聯賽失分，顯示出埋門把握力欠佳，雙方近5次聯賽喺日產球場交鋒，全部一球定勝負，總入球全開2球或以下，建議向中位數2.5球入球細埋手。
（有線662及602台周六下午1時直播）
東京鋒力大跌Watt
水手現以3分領先東京，得失球差有7球優勢，今場保持不敗固然篤定捧盃，就算水手輸波，只要唔輸多過3球，水手亦可憑較佳得失球差壓過ＦＣ東京稱霸。水手今季聯賽8次輸波從未試過淨輸4球或以上，不過佢哋今季首循環作客輸過2比4，為免晚節不保，相信水手會加強防守。再者，水手中場扇原貴宏黃牌夠數坐波監，今季射入14球嘅巴西鋒將馬高斯祖利亞，上仗鬥川崎又撼傷頭部，已經冇操3日，出唔出得都惡講，水手更加唔會冒險輕出。
ＦＣ東京今季有超過一半時間喺聯賽榜帶頭，可惜踏入季尾狀態下滑，近8場聯賽只獲3勝3和2負，僅入9球，埋門把握力明顯不足。更加雪上加霜嘅係，佢哋一對箭頭永井謙佑、迪亞高奧利華拉都有傷在身，前者膊頭甩臼剛啱叫做好番，可以紮住踢，後者披甲可能性好低，仲有出擊後衞室屋成停賽，想創造奇迹大勝封王難度極高。
今場波65,000張門票已經售罄，肯定創出日職入座紀錄，水手唔想令擁躉失望，必然採取穩陣嘅捧盃策略，何況佢哋主場近5次聯賽鬥東京雖得2勝3負，但係5次總入球全開2球或以下，入球細屬不二之選。