周日晚西甲激戰連場，打頭陣嘅有伊巴主場鬥基達菲。伊巴近況低迷，喺積分榜跌到落降班區邊緣，為免進一步失分踢法肯定謹慎；另邊廂基達菲不嬲慢熱，預料呢場雙方半場前都難分出勝負，半場和係好路。
（Now 632周日晚上7時直播）
基達菲打慣反擊入局慢
崇尚防守反擊戰術嘅基達菲，不嬲以穩健防守為先，近4仗保持不敗之餘，仲只係失過1球，可見善於激發球員鬥志嘅主帥波達拉斯，經常能令基達菲球員喺失去控球權的情況下從容布防，絕對係一支十分難纏嘅球隊。相比之下，基達菲進攻質素比較失色，上場雖然4比0擊敗利雲特，但全部都係靠死球同12碼先入到波，證明佢哋組織攻勢嘅能力有限。況且基達菲經常出現比賽初段入局較慢嘅毛病，計埋上場聯賽，近4仗全部半場同對手打和，搶攻能力好一般。
伊巴近期慘遭聯賽3連敗，其中2場都食白果，進攻乏力絕對係近況低迷嘅主因之一，現時球隊排名跌到落積分榜下半版，形勢非常嚴峻，為免再失分，呢場都唔敢踢得太進取，寧願做好防守縮住踢。既然兩軍同屬「保守派」，估計上半場都難以取得甜頭，一於捧半場和。