德甲獨腳戲法蘭克福主場對哈化柏林，哈化上輪雖僅負勁旅多蒙特，但無損魅力主帥奇連士文心情，佢認為球員已經畀咗積極回應，上仗遇強未能追和唔緊要，今場可以追番，作客面對同樣求勝心切嘅法蘭克福，黑柴推介中位數3.5球大盤。
（Now 670、FOX+、有線651及611台周六凌晨3時30分直播）
哈化上輪賽前炒咗克羅地亞教頭高域，搵咗闊別德甲10年，今年至加入哈化監事會嘅奇連士文復出接掌帥印，佢上任首戰喺主場鬥多蒙特，得到球迷同傳媒嘅熱烈歡迎，球員喺場上亦付出更大努力奔跑以作回應，雖然結果哈化仍然技遜一籌輸1比2，搞到喺德甲4連敗，排名跌到尾三，但「奇哥」對球員態度相當滿意，今仗佢將陣式由442調整為352，要求更強進攻，前線用盧克巴基奧同戴菲沙爾基兩位高速球員打反擊，有信心喺法蘭克福爭取入波。
主隊法蘭克福火力勁
法蘭克福近期分心歐霸，導致德甲3連敗，但連仗輸波多少因為人少打人多同欠運，而且攻擊主力鎌田大地、柏辛斯亞同巴斯杜斯都有貨交，尤其前者已經成為球隊進攻核心，今晚主場當然會搶攻，不過守將阿巴謙同杜明歷克哥亞停賽，料難保不失，何況兩軍首席門將奇雲查普同查斯甸今仗分別因為養傷同坐波監缺陣，有利雙方爭取入球。