H組最後一輪生死戰，阿積士主場鬥華倫西亞。阿積士拎1分就篤定出線，不過華倫西亞想出線必須力爭3分，阿積士夾硬死守盞出事，畀華倫隊入一粒乜仇都冇得報，倒不如採取主動，贏波攞埋首名資格出線仲好，阿積士主場出擊有本錢開W，撐主勝。
（Now 645及有線603台周三凌晨4時直播）
H組3強阿積士、華倫西亞及車路士為16強席位鬥到最後一輪，目前依然難分難解，阿積士暫列榜首，比其餘兩隊領先2分，形勢上頗為樂觀。不過，阿積士都唔係冇顧慮，如果大意輸畀華倫，車路士又贏波嘅話，佢哋就無啦啦跌咗落第3，真係喊都無謂，所以上周聯賽，見到雖然都有大部分正選上陣鬥威廉二世，但明顯就住踢，主場都輸0比2，對歐聯嗰種重視，司馬昭之心路人皆知。
阿積士自上季闖入歐聯4強後，雖有馬菲斯迪歷特和法蘭基迪莊兩大主力離隊，但留隊嘅雲迪碧克、杜辛泰迪治等仍保持水準，翼鋒薛耶治狀態亦相當出色，今季分組賽已攻入2球兼貢獻4次助攻，配合已於荷甲勁入10球的前鋒昆斯普美斯，火力可靠。
「蝙蝠軍團」首回合吞3蛋
華倫今季歐聯分組賽作客曾以1比0擊敗車路士及1比1賽和里爾，加上「蝙蝠軍團」首回合主場曾吞阿積士3蛋，今晚一旦另邊廂車仔先開紀錄，華倫更非勝不可，阿積士如果主守就死梗。不過，話分兩頭，到時華倫焗攻下有更多空位畀阿積士，阿積士今季歐聯4次主場出擊3勝1負，今場可以睇準出擊，主勝值得投以信心一票。