E組另一場仗拿玻里主場對亨克。拿玻里最近9場未贏過，由於今場唔輸就肯定出線肯定更保守，佢哋近5場歐聯4度開半場和，面對冇嘢好爭嘅亨克，半場和值得再追。
（Now 644、有線661及601台周三凌晨1時55分直播）
拿玻里以9分排第2，落後利物浦1分，領先第3位嘅薩爾斯堡2分，由於後兩者要正面交鋒，必有1隊失分，如拿玻里今輪打和，薩爾斯堡擊敗利物浦，出現3隊同得10分嘅局面，拿玻里亦可憑較佳對賽成績（對利物浦及薩爾斯堡均獲1勝1和），甚至取得首名出線，因此今輪大前提係保持不敗。
不過，拿玻里早前發生兵變，眾將不滿班主迪羅倫迪斯的「加操令」，無疑影響士氣，聯賽連盃賽在內，近9場只得7和2負，確實狀態欠佳，好彩拿玻里主帥安察洛堤係老江湖，曾帶領AC米蘭及皇馬歐聯封王，知道咩嘢時候做咩事，既然唔輸都晉級，一定穩陣行先。
亨克已出局無心戀戰
睇番拿玻里近5場歐聯4場開半場和，就知肥安求穩風格，況且包尾嘅亨克5戰只得1分，不但提早出局，連「降格」踢歐霸嘅資格都冇，冇乜鬥志可言，拿玻里可睇定先食，半場和有3.25倍好分頭值博。