今屆歐聯分組賽來到最後一輪，雖然有部分組別嘅出線席位已塵埃落定，但亦有其他組仍要鬥生鬥死，以H組形勢最為激烈，其中「3哥」車路士主場迎戰里爾，嚟到呢類生死關頭，我相信經驗、戰意兼備嘅車仔，可以大勝晉級。（有線656及616台周三凌晨4時直播）
里爾歐洲賽任人魚肉
雖然車仔只排第3位，但查實與「2哥」華倫西亞同分，落後榜首阿積士2分，由於後兩者今輪正面交鋒，至少一隊會失分，即係話車仔只要贏波，就唔使理嗰邊嘅任何賽果，肯定取得其中一個晉級席位，必定搏老命。相反，里爾應該冇乜戰意，佢哋唔單止已經出局，仲只得1分排包尾，連爭第3轉戰歐霸嘅機會都冇埋，翻查紀錄，計埋之前嘅球季，原來里爾近16仗歐洲賽（歐聯+歐霸）未贏過，令佢哋成為歐戰史上不勝紀錄最長嘅法甲球隊，可謂任人魚肉。
既然目標鮮明，我覺得2012年歐聯盟主、上屆亦捧走歐霸嘅車仔，可以大炒對手出線。仲有一樣值得留意，係車仔少帥林柏特崇尚進攻，唔會因為領先緊便縮後保住勝果，反而爭取擴大比數，充滿娛樂性，因此可預計今仗會上演入球騷。