打吡戰Round 1不敵西部聯
今日下午澳職頭場爆發墨爾本市打吡，新軍西部聯主場硬撼墨爾本勝利。西部聯近期跌Watt跌得幾犀利，3連敗冇晒開季時嘅氣勢，勝利上仗終走出4場不勝困局，勢必食住度氣喺打吡戰揚威，此消彼長，受讓嘅勝利下盤值得捧場。
（myTV Gold 302、Now 639、有線655及615台周日下午1時直播）
今次係雙方本季第2次交鋒，上次西部聯作客落後2球下，連追3球爆冷反勝3比2，今次雖然返回地頭出戰，理論上更有優勢，不過西部聯近況認真麻麻，佢哋近3場聯賽輸晒兼冇波入，陣中幾名星級老將包括貝利沙、迪亞文迪等都冇料到，完全帶唔起隊波，氣勢同季初相比可謂差天共地，亦某程度顯示，澳職列強已開始摸清呢支新軍嘅底牌，相信西部聯嚟緊都幾難捱。
戰績反彈受讓筍
3屆常規賽及4屆季後賽冠軍墨爾本勝利，底蘊當然遠勝西部聯，單係貝利沙當年最風光嗰陣，就係效力勝利成為一代戰神。儘管佢哋今季演出令人失望，開季8場聯賽僅獲2勝2和4負，依家已經被榜首FC悉尼甩開成條街，要爭奪常規賽冠軍機會漸趨渺茫，不過貴為墨爾本市1哥，勝利當然唔想連續2場打吡戰輸波。加上勝利上場以1比0擊敗珀斯光輝，總算終止4場不勝頹勢，士氣點都好過3連敗嘅西部聯，預計墨爾本勝利今場有力反客為主，有得受讓平半咁筍，下盤不容錯過。