周五凌晨英超另一場對決，升班球隊錫菲聯將會主場鬥紐卡素。錫菲聯今季將整體壓迫戰術發揮到極致，搞到唔少對手無所適從，呢場對住狀態飄忽嘅積分榜下半版球隊紐卡素，錫菲聯有望再取佳績，錫菲聯上盤值博。
（Now 622周五凌晨3時30分直播）
錫菲聯領隊韋達繼上季帶隊英冠奪亞軍，強勢重返英超之後，今季再率領球隊喺英超站穩陣腳，近7場聯賽保持不敗，包括先後擊敗阿仙奴同般尼兩支聯賽勁敵，賽前以19分排名積分榜中游位置，表現毫不失禮。雖然冇大牌球星壓陣，不過戰意旺盛嘅錫菲聯靠出色嘅整體壓迫戰術，成功抑制對手進攻組織效率嘅同時，仲為己方創造唔少前場偷雞機會，競爭力絕對唔可以睇小。
紐卡素表現勁飄忽
布魯士帶隊嘅紐卡素今季發揮極之唔穩定，雖然上演過2比2逼和曼城嘅好戲，但「喜鵲」都曾試過以0比2輸畀新升班嘅阿士東維拉，而且紐卡素係典型主強客弱嘅球隊，近5仗作客僅得1勝4負，其中有3場都食白果，呢次造訪近況不俗嘅錫菲聯都難有作為，寧願捧錫菲聯上盤好過。