今夜歐聯頭場之一，兼E組尾輪關鍵大戰，衞冕嘅利物浦作客火併薩爾斯堡。兩軍只差3分，利物浦若輸波有出局之危，不能坐以待斃，薩爾斯堡為出線更加係非勝不可，以艾寧夏蘭特、南野拓實為首嘅鋒線必火力全開，遇上利物浦前線嘅「埃及文明」組合，擺明係鬥攻格局，3.5球嘅入球大有買趁早。
（myTV Gold 303、Now 643、有線656及616台周三凌晨1時55分直播）
上屆歐聯盟主利物浦，依家喺E組以10分排榜首，領先拿玻里1分，薩爾斯堡則以7分排第3位，由於拿玻里今輪唔輸即出線，因此很大機會出現紅軍同薩爾斯堡「兩隊只能活一隊」局面。當然，利物浦今場和波亦可出線，但若果咁唔好彩輸波，或者未能取得4比5或以上僅輸1球嘅賽果，而拿玻里唔輸的話就會出局，因此出線唔係想像中咁穩陣。
呢支英超「1哥」想玩保守保住優勢？睇番佢哋今屆5場歐聯都未能保持清白之身，包括兩鬥弱旅亨克均有失球，防線不穩，加上洛夫雲上仗傷出，焗用祖高美斯打中堅更牙煙，倒不如以攻代守，除咗沙迪奧文尼及羅拔圖法明奴持續勇態外，王牌穆罕默德沙拿近期獲得輪換休息，日前聯賽大勝般尼茅夫3比0之役，佢入波兼交出靚助攻，狀態明顯回升。就連後備嘅奧歷治及梳頓沙基利亦有貨交，若果有乜依郁可隨時候命。
夏蘭特歐聯場場入波
另一邊廂，薩爾斯堡為出線今輪非勝不可，由於首循環作客利物浦僅輸3比4，只要今場贏波，又或者係低於5比4嘅贏1球賽果，便肯定壓過對手晉級，不過呢支奧地利班霸一向重攻輕守，挪威小將夏蘭特今屆歐聯5場分組賽場場有士哥，南韓前鋒黃喜燦及日本球星南野拓實亦屢建奇功，3人近5場歐聯合共轟入13粒，連同歐聯附在內，難怪薩爾斯堡近6場歐聯5次開4球或以上，今場癲鳳鬥狂龍實多波入，3.5球嘅大盤不容錯過。