英超「1哥」利物浦作客般尼茅夫，紅軍於周中快車5比2大炒愛華頓，氣勢如虹，該仗收起前鋒穆罕默德沙拿擺明為今晚準備，因為沙拿係般茅剋星，近4次交手場場有士哥，合共省入6粒，呢4場全部贏般茅3球或以上，利物浦讓一球/球半，上盤抵玩到極。
（Now 621周六晚11時直播）
「埃及王子」近4次交手省6粒
利物浦愈嚟愈有冠軍相，因為佢哋好多時喺重要時刻，都入啲幸運波全取3分，加上後備球員有機會上陣都交到貨，呢啲就係冠軍特質喇。好似周中快車默西賽德郡打吡，領隊高普正選陣容收起穆罕默德沙拿同羅拔圖法明奴，前者甚至冇入選大軍名單，但一樣憑奧歷治梅開二度，大炒愛華頓5比2，氣勢夠晒強勁。
紅軍門將艾利臣比加早前對白禮頓被逐，今場刑滿復出把關，呢位剛奪得「耶辛獎」嘅巴西門神，穩定性遠比「神經刀」阿祖安卡斯迪路為高，配合中堅華基爾雲迪積克，防守力即刻暴升。
般尼茅夫傷兵滿營，周中快車不敵水晶宮0比1，累積4連敗。翻查往績，兩軍近4次碰頭紅軍全勝之餘，4戰均贏3球或以上，沙拿更場場有士哥，共轟入6球，佢周中抖夠，今晚鬥私房菜又可以擦餐飽，上盤趁早買。