白禮頓遇強即屈益晒龍Sir
今晚英超快車壓軸尾場，阿仙奴於主場迎戰白禮頓。阿仙奴上場踢到不知所謂，看守領隊龍格保為博坐正，首度主場領軍不容再失，好彩撞正作客遇強腳軟嘅白禮頓，絕對係「龍Sir」開齋、終止球隊8場不勝嘅大好時機，主W熱透得1.52倍，有買趁早。
(Now 621及611周五凌晨4時15分直播)
「9仔」阿仙奴今季愈踢愈沉，高層忍無可忍怒炒艾美利，上周委任助教兼球隊名宿龍格保做看守領隊，但日前作客只能逼和弱旅諾域治2比2，前中後3線隔得太開、防線以多打少仍解唔到圍嘅情況冇變過，唔係門神賓特尼奴連番撲救隨時輸埋，難怪有傳高層未必扶正佢。
不過公平啲講，「龍Sir」喺球隊嘅江湖地位，確係鎮得住班大帝，上場佢哋係打得積極咗，隊長奧巴美揚更身先士卒省兩粒，精神面貌係有改善。始終除咗打法之外，阿仙奴喺各項賽事已8場不勝，明顯係信心問題，心病還需心藥醫，球員時代以鬥志見稱嘅「龍Sir」，呢方面正正係佢強項。好似日前曼聯名宿史高斯認為龍格保首場領軍應該要着西裝，咁先顯示出佢對呢位工作嘅自豪感，點知「龍Sir」輕輕一句話自己匆匆上任，件西裝仲喺洗衣舖未攞，輕鬆化解一些惡意批評，仲同球員講要帶住快樂嘅心態踢波，乘機幫佢哋減壓。
「海鷗」傷兵多惡唔出樣
仍喺下游掙扎嘅「海鷗」，查實只落後阿仙奴4分，不過呢支弱旅作客遇強即屈，今季聯賽4次造訪利物浦、曼城等Big 6球隊，唔單止輸晒，其中3仗於上半場已經落後，由頭輸到落尾，全無還手之力，今仗仲有荷西伊斯基亞度、蘇利馬治、貝拿度費南迪斯等因傷倦勤，惡唔出樣。阿仙奴今季聯賽主場未輸過，「龍Sir」仲唔趁機爭取上任後首場勝仗，兼拉票博留任咩，簡簡單單捧主勝。