今晚英超獨腳戲上演倫敦打吡，沉到爆嘅阿仙奴作客「錘仔幫」韋斯咸。阿仙奴轉用看守領隊龍格保後未見起色，連續9場未贏過創42年來新低，場場畀人「風冚」咁攻點反彈呀？加上近年造訪韋斯咸例冇運行，冇本錢讓波，寧捧「錘仔幫」讓球主勝。
（Now 621周二凌晨4時直播）
近期英超興搵球隊名宿救亡，上季曼聯有蘇斯克查，今季車仔就搵番林柏特，連愛華頓上周亦提升鄧肯費格遜頂住檔先，個個都交到貨，佢哋經驗唔夠唔緊要，最起碼令球員打番起「血性足球」，愛華頓日前贏車仔3比1就係最佳例子。阿仙奴亦有樣學樣，之前怒炒艾美利後，將助教兼名宿龍格保轉做看守領隊，點知頭2場對弱旅諾域治同白禮頓，只得1和1負，連續9場未贏過創42年來新低，戰術混亂之餘，連最基本嘅鬥心都唔多夠，好似上仗主場以1比2輸畀白禮頓，全場畀人射門達20次，呢點喺今季經常出現，堂堂Big 6勁旅顏面何存，龍Sir真係要有排執。
韋斯咸尼敦賀蘭特崛起
另一邊廂，韋斯咸狀態都唔好得幾多，近5仗只得1勝4負，不過贏嗰場正正係對車仔，近3次對Big 6勁旅亦獲得2勝1負，遇強愈強，而且主帥比歷連尼亦有被炒危機，睇番佢哋其實只差阿仙奴3分，今仗贏波即可跳出下游，鬥志必堅。「錘仔幫」青訓一向出色，近期則有21歲新星尼敦賀蘭特崛起，佢今季喺二隊上陣11場入9粒兼交出6次助攻，上周中快車對狼隊更後備入替，首度為一隊於英超上陣，日前佢亦冇參與預備組賽事，隨時成為今仗秘密武器。翻查紀錄，阿仙奴近4次作客韋斯咸，贏得1場咁大把，實在讓唔到「錘仔幫」，讓球主勝咪錯過。