星級少帥挑機班霸
周六晚德甲上演龍爭虎鬥，一哥慕遜加柏主場鬥班霸拜仁慕尼黑，雙方狀態同樣火熱，兩軍賽前都揚言以贏波為目標，近4次碰頭就合共炮製咗18個入球，今晚強鋒火併相信會再演入球騷，黑柴推介中位數3.5球大盤。
（Now 670、FOX+、有線651及611台周六晚10時30分直播）
今仗慕遜加柏嘅普路士公園球場逾54,000張門票早早沽清，亦係兩軍頂級射手大對決，慕遜加柏嘅馬古斯杜林同比列安保路近況弗爆，喺主場有條件挑戰拜仁嘅射手王羅拔利雲度夫斯基同新貴基拿比，不過慕遜加柏雖然係德甲主場王，但主場7戰失10球卻係德甲主場前7名失波最多球隊，至於拜仁防線始終唔齊人，亦係德甲作客前4名失波最多嘅球隊。
馬高路斯領軍一直贏
今仗係慕遜加柏嘅新教頭馬高路斯首度挑戰拜仁，呢位43歲東德少帥已經注定係未來星級教練，佢2013年喺奧地利薩爾斯堡青年隊展開執教生涯，兩季前升格薩爾斯堡一隊，到今季升格德甲慕遜加柏，過去3季分別攞晒奧地利青年聯賽、同兩屆奧地利甲組聯賽冠軍，今季帶領慕遜加柏亦雄踞德甲榜首，嚴格嚟講近年係一直贏，佢崇尚進攻，戰術靈活多變，而且注重細節，令慕遜加柏陣上表現既悅目又有成績，今晚初遇拜仁佢話得贏波一個目標。
拜仁上輪主場1比2不敵利華古遜，但客軍踢出近年最佳水準，翼鋒里安拜尼同門將哈迪基亦踢出人生代表作，不過拜仁全場射門24次，包括3次中門框同多次臨門失機，計表現同火力絕唔失禮，輸波後壓力更大，由於臨時主帥漢斯弗利克深受球員愛戴，眾將勢必求勝力保教練飯碗，今晚作客同加柏鬥攻，入波又點會少？