走出谷底主場必搶
今日澳職壓軸戰，珀斯光輝主場迎戰西悉尼流浪者。強勢開咧嘅流浪者近期大跌Watt，聯賽4連敗愈戰愈曳，相反光輝啱啱走出4場不勝谷底，可藉主場之利乘勝追擊，主勝好路。
（myTV Gold 302、Now 639、有線655及615台周六晚6時45分直播）
流浪者今季有個極佳開局，頭3場聯賽贏晒，前鋒米歇爾杜基更連場有入波，不過佢哋自上月起突然狀態急跌，連續5場聯賽不勝，其中近4場輸晒，從榜首跌到落中游，米歇爾杜基喺近5場只入1粒之餘，防線又經常於比賽末段失守，由和變輸，連場甩轆，成班球員陷入信心危機，短期內難望反彈。
射手科拿路利逐漸上力
相反，光輝今季出閘脫腳，與中場核心迪亞高卡斯度未上力、前鋒安迪基奧治離隊有關，好彩呢支上季常規賽盟主終於翻生，上場作客「2哥」墨爾本城大勝3比0，結束聯賽4仗未贏過嘅頹勢，士氣大振，箭頭科拿路利近6場聯賽亦有3球進帳，逐漸融入球隊，就連後衞奧沙麥馬歷都谷番起狀態，有望今仗披甲助拳，令人腳更加完整。翻查紀錄，原來光輝主場出擊專剋流浪者，近4次聯賽主場碰頭取得3勝1和，包括上季落後1比3劣勢下，竟喺最後11分鐘連入3球反勝4比3，堅係戲劇性，今場可藉地利追打落水狗，主勝捧得過。