贏埋杜塞就通殺
德甲踢到第15輪，今季爭持嘅激烈程度絕對係十幾年來之最，隨住拜仁同多蒙特表現持續唔穩定，令到列強都蠢蠢欲動，希望把握難得機會挑戰德甲寶座，「小富豪」RB萊比錫就係其中之一，今晚作客面對已經跌落降班區嘅杜塞爾多夫贏面極高，萊比錫讓一球，上盤係穩陣之選。
（Now 670、FOX+、有線651及611台周日凌晨1時30分直播）
未分析呢場波之前，先分享吓德國網站《踢球者》做嘅今輪對賽球隊有趣數據，首先係拜仁慕尼黑對雲達不來梅，原來拜仁嘅甘美治同不來梅嘅卡拉臣，係今季德甲跑得最多嘅兩位球員，經過14輪比賽，甘美治跑咗170公里，卡拉臣亦跑咗166公里；至於科隆對利華古遜，利華今季平均每場跑咗120.3公里，德甲最多，相反科隆只跑111.7公里最少，位列包尾冇得怨人，呢場唔使講大家都知黑柴會捧利華；聽日至踢嘅史浩克04對法蘭克福，兩隊進攻手段截然不同，法福今季共有321次兩翼傳中波最多，史浩克只有137次最少，淨係法福嘅菲臘高斯迪已經有109次傳中，幾乎追到史浩克全隊。
華拿近6仗10入球5助攻
至於呢場杜塞爾多夫對萊比錫，萊比錫32歲少帥拿高斯文近期春風得意，除咗帶領球隊喺歐聯分組賽首名出線外，德甲亦5連勝，但原來佢執教至今，已經喺德甲贏過24支球隊，只有一隊現時德甲隊伍未贏過，就係杜塞爾多夫，上季佢帶賀芬咸兩遇杜塞只係1和1負，喺對方老帥芬基面前未威過，今晚當然希望可以刷埋呢個數據啦！萊比錫前線擁有德甲最弗射手迪姆華拿，佢近6場正式賽事合共交出10個入球同5次助攻，近況更勝拜仁利雲度夫斯基，翼鋒沙比薩同尼干古亦大勇；杜塞上輪吞完多蒙特5蛋，今仗仲有中場艾法度摩拉利斯停賽，冇本錢做攔路虎。