走勢強勁嘅英超「2哥」李斯特城，今晚主場出擊鬥諾域治。「狐狸」陣中球員無論默契或狀態都處於巔峰，加上唔使分心歐洲賽，可以全力喺聯賽搏殺，繼續追趕利物浦。呢場遇上後防穿晒窿嘅諾域治，點會停下腳步？一於力捧李城上盤。
（Now 622周六晚11時直播）
李城今季嘅成功之道，除咗眾所周知嘅犀利進攻之外，亦在於滴水不漏嘅後防，「狐狸」聯賽至今只係失咗10球，係英超後防最硬淨嘅球隊，比起「1哥」利物浦仲要失少4球，加上出色嘅入球數字，令李城得以坐擁「+29」嘅聯賽最佳得失球差成績。
華迪腳風順到爆
除咗蘇恩古同莊尼伊雲斯呢對中堅夠穩陣之外，做好中場屏障一職嘅尼迪迪亦係功不可沒，畀老將占美華迪為首嘅一班前場攻擊手可以無後顧之憂壓上搶士哥，呢位32歲前鋒射術愈老愈精湛，連續8場聯賽有斬獲，當弗到咁，一般對手可以根本無力阻到佢。
相反，客隊諾域治至今失咗34球，係英超失球數第2多球隊，首席門將告魯爾嘅獨門絕技係撲救12碼，但運動戰中嘅把關能力認真麻麻，領隊丹尼爾法基如果再唔改變佢哋重攻輕守嘅踢法，好難同狀態大勇嘅李城對撼，即使李斯特城讓1.5/2球，上盤依然值博。