力爭前4嘅車路士主場硬撼般尼茅夫。車仔季初喺林柏特帶領下踢出悅目足球，不過經過一輪「青春風暴」之後，呢排戰術轉趨穩陣，始終聯賽唔可以場場都咁搏，今場對般尼茅夫或會歎慢板，半場和值得一試。
（Now 621周六晚11時直播）
車仔除咗周中歐聯以2比1擊敗里爾，以小組次名進身16強外，現時喺英超更排第4，以新任少帥來說，林柏特成績合格有餘。「林伯」近期亦一改進取作風，加上譚美阿巴謙早排養傷，車仔踢法變得穩陣，尤其主場出戰以做好防守為主，最近5場聯賽主場全開半場和，但無礙球隊搶分，呢5場當中只有1場爆冷輸畀韋斯咸，其餘4場贏晒，今場對住般尼茅夫，又可以慢慢開餐。
般尼茅夫傷兵多難靠
般尼茅夫今季最大問題係傷兵太多，前鋒祖舒亞京治、中場舒文及後衞查理丹尼斯仲養緊傷，搞到球隊聯賽5連敗，依家跌到落15位，捲入降班漩渦，相信般茅作客史丹福橋球場只希望藉死守搶分，換邊前或與車仔呈膠着狀態，半場和有賠率值博。