輪休得宜前線個個弗
完成歐聯分組賽晉級任務嘅利物浦，周六早場於主場迎戰屈福特。晏菲路球場威力驚人，「紅軍」今季聯賽於主場出擊錄得8戰全勝佳績，當中7場換邊前已經取得領先優勢，而且一眾攻擊球員狀態大勇，不論「三叉戟」穆罕默德沙拿、沙迪奧文尼及羅拔圖法明奴，或是奧歷治及沙基利都可以輪換上陣搏殺，相信今場一樣可以輕取屈福特，半場主勝唔好嫌熱。
（Now 621及611周六晚8時30分直播）
「紅軍」領隊高普深知英超係大長途賽事，所以佢早排已經講明唔會畀部分球員踢晒所有賽事，更付諸實際行動，上周中快車默西賽德郡打吡大勝愛華頓5比2一役，便收起羅拔圖法明奴及穆罕默德沙拿，之後作客般尼茅夫，則輪到沙迪奧文尼掛免戰牌。到周中歐聯生死戰，利物浦又用番「三叉戟」踢正選，結果沙拿亦射入高難度入波，幫球隊作客以2比0擊敗薩爾斯堡，以首名進身16強，可見高普嘅輪休戰術收到理想效果，主力獲得充分休息之餘，亦打起奧歷治及梳頓沙基利，令到球隊陣容變化更大，今場亦有可能幾名中前場球員撈亂用，戰術變化會令對手難以防範。
高普續約至2024
同時，利物浦賽前收到好消息，就係佢哋成功同球隊「靈魂」高普續約。早前盛傳於2022年約滿後會離開紅軍嘅高普，終被球隊誠意打動，帶埋自己嘅團隊簽多2年合約至2024年，並由700萬鎊加到1,500萬鎊，追平摩連奴人工，成為全球第2高薪領隊，僅次於年薪2,000萬鎊嘅哥迪奧拿。
屈福特積弱遇強等劏
另邊廂，屈福特上場由皮亞臣接手後，主場與水晶宮踢成0比0，終止3連敗，但呢隊波積弱太久，作客如日方中嘅利物浦只能死守，但「紅軍」晏菲路威力強勁，今季聯賽主場8戰7次半場領先，對手包括勁敵曼城，以屈福特實力難頂利物浦狂攻，1.43倍半場主勝熱得有道理。