周五澳職獨腳戲，布里斯班獅吼主場鬥西部聯。獅吼近期踢法夠開放，尤其是頭號射手奧當路雲頻頻搶士哥，有足夠本錢跟對手鬥攻，面對同樣有多位實力猛將壓陣嘅聯賽新軍西部聯，入球騷相信冇走雞，中位數2.5球入球大值博。
（myTV Gold 302台、Now 639、有線615及655台周五下午4時30分直播）
獅吼上場聯賽以1比5不敵FC悉尼，後防潰不成軍，事實上由利物浦名宿科拿領軍嘅獅吼，今季防線已經唔只1次出現崩壞情況；計埋上仗，獅吼近4仗取2勝2負，4仗當中3次開出總入球3球或以上，開咧至今失球數字達到13球，屬澳職防守成績第3差嘅球隊。可幸隊中有季前由紐卡素噴射機加盟嘅射手奧當路雲做救世主，呢位愛爾蘭前鋒聯賽至今斬獲6球，腳風奇順，今仗有力再擔起獅吼進攻重任。
老將貝利沙腳風順
西部聯靠老將撐起半邊天，其中頭號射手貝利沙今季重返澳職之後，聯賽至今轟入5球，足證寶刀未老，配合前意大利國腳迪亞文迪同曾在意甲打拚多年嘅彭拿基奧迪斯干尼，西部聯進攻板斧用嚟對付後防欠穩嘅獅吼絕對綽綽有餘，兩軍都係主動型球隊，中位數2.5球入球大不容錯過。