德甲快車上演前列大戰，啱啱做番1哥嘅RB萊比錫作客第3位嘅「蜜蜂兵團」多蒙特，兩軍近績出色，但相比下萊比錫狀態更銳，人腳更齊，少帥拿高斯文揚言要喺德甲衝冠，撞啱多蒙特一雙主力防中繼續休戰，萊比錫受讓平半值得捧場。
（Now 670、FOX+、有線651及611台周三凌晨3時30分直播）
萊比錫德甲6連勝共入25球，歐聯亦小組首名出線，上輪作客對杜塞爾多夫，拿高斯文輪換5個正選都炒對手3蛋，難怪少帥都話滿意，佢上季帶領賀芬咸兩戰多蒙特都唔使輸，如今帶住更強嘅萊比錫又使乜怕呢？中場輸血管科斯貝治同箭頭尤素夫保臣上輪輪休，今晚蓄銳復出。除咗鬥衝冠，今場仲係牙骹戰，因為挪威新人王艾寧夏蘭特上星期喺經理人安排下，先後訪問過萊比錫同多蒙特兩會，多蒙特已率先開價，但同夏蘭特母會薩爾斯堡關係密切嘅萊比錫，經理明斯拉夫亦講明想簽佢，今仗要畀佢睇清楚邊隊更值得加盟。
多蒙特歐聯奇迹出線，德甲亦3連勝同樣弗，不過一對主力防中韋素同湯馬士迪蘭尼齊養傷，上輪對弱旅緬恩斯未睇到問題，但遇上反擊速度極快嘅萊比錫就唔易頂，韋素一直係球隊防線第一道屏障，之前佢只缺陣1場德甲，多蒙特就以1比3輸咗畀柏林聯，何況球隊表現始終唔穩定，仲經常慢熱，上月尾主場對柏達邦竟然可以半場先落後3球，今晚高手過招，再出現呢啲毛病輸埋都唔出奇。