遇紅軍二隊主W冇味
今晚英格蘭聯賽盃8強開打，其中英超「1哥」利物浦作客阿士東維拉。紅軍所有主力都赴卡塔爾出征世冠盃，今仗只派二隊出戰，難怪維拉主W熱到冇肉食，佢哋今屆英聯盃例必搶攻，轉捧3.5球嘅入球大更上算。
（周三凌晨3時45分直播）
利物浦小將肯走肯搏
睇到足智彩個主客和賠率，大家唔好以為自己眼花，維拉主勝竟然只得1.3倍，英超「1哥」利物浦客W竟然有5.65倍。無他嘅，由於喺卡塔爾舉行嘅世冠盃，同今仗英聯盃嘅賽程重疊，之前已有口痕友講利物浦會分兩隊出戰。
果然，佢哋日前公布出征世冠盃嘅名單，除咗受傷嘅洛夫雲冇份之外，全部主力都齊晒，當然包括「埃及文明」鋒線穆罕默德沙拿、羅拔圖法明奴及沙迪奧文尼，連日前對屈福特傷出嘅韋拿杜姆都有隨隊，意味住今仗對維拉，真係全二隊陣容，包括哈維艾利洛、薛比雲丹貝治及基賀華等新仔，查實佢哋部分都喺今屆英聯盃出過場，實力同經驗梗係差主力幾條街，但勝在肯走肯搏，鬥心唔使懷疑。
維拉今季表現其實唔錯，但經常因防線甩轆搞到喺聯賽失分，睇番佢哋今屆3場英聯盃，合共入咗11粒，包括上圈以2比1淘汰同屬英超嘅狼隊，不過要留意，佢哋3場都有失波，再次印證呢支中部球隊入得又失得，既然主W熱到爆，不妨向3.5球嘅入球大埋手。