射手去留困擾法林明高
今晚喺卡塔爾舉行嘅世冠盃上演首場4強戰，南美代表法林明高火併亞洲代表希拉爾。今季雙料冠軍法林明高，因射手加比爾巴保沙去留未定，或影響軍心，而且巴西代表近6屆世冠盃只曾1次躋身決賽，而於4強戰亦未能在法定時間內贏波晉級，面對近況唔差嘅希拉爾唔易踢，冇本錢讓波，寧捧讓球客勝。
（無綫85台周三凌晨1時30分直播）
法林明高上月一搔38年之癢擊敗河床捧南美自由盃，之後再於巴甲封王，以25球榮膺聯賽金靴嘅加比爾巴保沙更係重要功臣。雖然呢位國米借將想留隊，但法軍未必畀得起錢買斷佢，喺去留未定下或影響比賽心態，連同中場核心迪亞高因傷倦勤，實力受削。
沙特阿拉伯班霸希拉爾上月復仇成功勇挫浦和紅鑽，重奪亞冠盃兼一洗2年前決賽落敗之恥，前法國國腳巴菲迪比高美斯更以11球成為賽事神射手，加埋前意大利國腳基奧雲高，前者喺日前世冠盃第2圈對艾斯柏蘭斯一箭定江山，攻力不容忽視。
巴西球隊近年未威過
況且南美代表近年喺世冠盃不復當年勇，唔單止冠軍畀歐洲代表壟斷，單計近6屆巴西代表只曾1次殺入決賽，而於4強戰亦未能在法定時間內贏波，加上舟車勞頓遠赴亞洲比賽，隨時陷於苦戰，寧捧希拉爾讓球客勝。