龍格保領軍防線崩壞
今晚英超壓軸戰，阿仙奴主場對曼城。阿仙奴自龍格保接手後，終於喺執教第3場開齋，但槍手嘅防線問題並未解決，場場失波當食生菜，喺新帥未上任之前，後面肯定繼續「走火」，今晚面對攻力強勁嘅曼城，相信會有大手交易場面，樂比簡單揀個大盤，中位數3.5球有1.82倍。
（Now 621及611周一凌晨零時30分直播）
阿仙奴辭退艾馬利後，好多人都寄望看守領隊龍格保會帶來新景象，但自打和諾域治2比2及主場不敵白禮頓1比2後，球迷開始失去耐性，希望球會盡快搵新領隊「坐正」，目前呼聲最高係前拿玻里教練安察洛堤，次熱則係今場對手曼城助教兼前阿仙奴隊長阿迪達，無論係邊個上任都好，樂比認為阿仙奴應盡快落實新教頭，撥亂反正，因為球員普遍對龍格保已失去信心。
事實上，阿仙奴近年最大問題係來自防線，但龍格保上任後唔單止冇改善，仲令情況惡化，執教4場已失咗7球，首仗起用梅斯達菲已孭晒鑊，之後發現大衞雷斯都係毒瘤嚟，最近起用哥林張伯斯同柏柏斯達夫普路斯，雖然兩人都質素平庸，但起碼踢法正路啲先，不過如果阿仙奴唔正視防線同中場間嘅協調，吓吓「廠」門大開，前面入幾多都冇用。
兩軍射手質高態勇
曼城今季確實冇上季「三料冠軍」咁勇銳，目前落後榜首嘅利物浦14分，不過論攻擊力曼城仍然係英超之冠，單計入球率每場2.75球，其實比上季奪冠時更優勝。即使阿古路今仗繼續因傷倦勤，但加比爾捷西斯、史達寧嘅入球觸覺唔需要懷疑，其中加比爾捷西斯剛於上周中歐聯連中三元，今場係時候騷哥利。
睇番曼城近年都真係食住對手，近5次交手都贏兩球或以上，而阿仙奴今季對Big6未贏過都真係冇晒符，不過槍手嘅進攻能力始終有番咁上下本錢，奧巴美揚今季入11球腳風甚順，兼且拿卡錫迪今季5個入球全部來自主場，相信都可以喺曼城身上入波，波膽不妨向曼城贏3比1及4比1埋手。