戰神撻着火力有保證
周五下午澳職獨腳戲，西悉尼流浪者主場迎戰「3哥」西部聯。流浪者近況衰到貼地，連敗走勢令信心受挫，相反作客夠醒嘅西部聯，有「澳職戰神」貝利沙頻頻搶士哥，戰力有保證，有望再下一城，平手盤一於捧西部聯。
（myTV Gold 302、Now 639、有線615及655台周五下午4時30分直播）
澳職新軍西部聯最近擺脫3連敗頹勢，近2場聯賽先後擊敗墨爾本勝利同布里斯班獅吼，積分榜成功攀上第3位。西部聯繼續靠老將撐起半邊天，前意大利國腳迪亞文迪近2仗都有助攻，表現漸入佳境之外，同祖舒亞列斯頓包攬助攻重責，不過最搶鏡，依然係今季重返澳職嘅射手貝利沙。呢位34歲老將今季已經斬獲6球，聯賽累積入球數達121球，繼續穩坐澳職史上士哥王榜首，重振「澳職戰神」威名。
流浪者近6仗不勝
開季聯賽3連勝嘅流浪者，自上月起狀態大幅下滑，近6場聯賽未贏過之餘，其中近5場仲輸晒，包括曾作客以1比2不敵西部聯。季初頻頻搶士哥嘅前鋒米歇爾杜基，近6場入得1球，信心跌落谷底，直接影響球隊搶分能力。況且西部聯今季開咧至今4場作客取3勝1負，客場表現明顯醒過主場，呢次造訪聯賽5連敗嘅流浪者，絕對可以趁火打劫，平手盤實揀西部聯。