今晚以盃賽做主打，最有心水嘅梗係比利時盃8強大戰，安德列治主場硬撼布魯日。安德列治今季堅飄忽，日前聯賽激戰後未回氣，布魯日表現更穩定，加上近年碰頭食住對手，客勝有計。
（周五凌晨3時45分開賽）
安德列治暫時排喺比甲第10位，季初更因戰績欠佳，將回巢兼任教頭嘅高柏尼貶番做球員，可惜作用唔大，戰績依然飄忽，各項賽事近5仗僅獲1勝，日前聯賽打吡戰逼和標準列治1比1，仲因打少個耗力甚巨，相信未回得切氣。
相比之下，布魯日表現更穩定，開季18場比甲取得14勝，喺榜首帶緊頭，雖然歐聯已經出局，但試過作客賽和皇馬2比2，絕不失禮，造訪安德列治唔會Hea踢，一定想贏波兼踢死敵出局。睇番雙方近5次交手，布魯日4勝1和未輸過，擺明格食格，客勝有買趁早。
飛燕諾炒得起乙組仔
至於荷蘭盃第2圈，甘堡爾主場迎戰飛燕諾。甘堡爾只係乙組仔，而且啱啱新敗，為專注爭升班隨時留力，飛燕諾今季喺荷甲戰績麻麻，梗係想喺盃賽發圍，兩隊近6次碰頭飛燕諾贏晒，今場讓波都不妨直取讓球客勝。（周五凌晨3時45分開賽）
最後葡萄牙盃16強賽事，法馬利卡奧主場對馬夫拉，法馬利卡奧雖然喺聯賽3連敗，但今季升上葡超即位居前列，認真唔講得笑，呢班波一向重攻輕守，近8仗有7次開3球或以上，對住甲組仔馬夫拉一定狂攻，捧入球大更佳。
（周五凌晨4時30分開賽）