賽事頻密最緊要識留放
英超聖誕快車全面開動，首站即有勁爆戲碼，今晚尾場壓軸戰曼城主場鬥李斯特城。「狐狸」李城今季防守力驚人，係現時英超失波最少隊伍，曼城對住銅牆鐵壁要入波唔係咁易，兩軍近年碰頭少有大手交易，加上快車賽期要懂得留放，捧3.5球入球細啱數。
（Now 621及611周日凌晨1時30分直播）
曼城今季受嚴重傷兵困擾，先有中後場球員輪流受傷，11月下旬再有王牌前鋒阿古路變成「十字兵」，即使主帥哥迪奧拿功力如何深厚，始終唔係「賭神」，無法將手上一副「爛牌」變好，現時只能緊隨李斯特城其後排第3位，同榜首利物浦更加相距14分之多。
曼城傷兵多「狐狸」防守穩
李斯特城今季屢創驚喜，除射手占美華迪大爆發外，隊中小將占士麥迪臣、泰利文斯及芝維爾等人的表現亦日漸成熟，加上領隊羅渣士先做好防守工作嘅戰術，「狐狸」不但藉此殺上次席，得失球差亦係目前英超最佳。李城開咧至今17場聯賽僅失11球，比「1哥」利物浦更少3球，為英超失球最少隊伍，今場火併曼城肯定先做好防守。
不過，值得留意嘅係，英超聖誕新年快車賽期相當頻密，各隊都要識得留放，尤其高手過招，更加會係「一招了」，肯定要踢得更謹慎。「藍月亮」近5次對李城僅2勝2和1負，唔係話贏硬，加上兩軍近7次對壘，6次法定時間總入球都喺3球或以下，今場捧中位數3.5球細更佳。