周六晚英超早場，愛華頓主場硬撼阿仙奴。「拖肥糖」自鄧肯費格遜任看守領隊之後，班波鬥志十足，尤其進攻明顯改善，呢場遇上已冇失分空間嘅「兵工廠」，兩軍為搶分必定大打出手，中位數2.5球入球大值博。
（Now 621及611周六晚8時30分直播）
「拖肥糖」看守領隊有料到
兩軍賽前換帥傳聞甚囂塵上，不過無論邊個接手，都未必嚟得切喺呢場比賽帶隊。其中喺看守領隊鄧肯費格遜麾下嘅愛華頓，先後以3比1擊敗車路士，之後作客曼聯踢成1比1，周中聯賽盃再喺法定時間逼和李城2比2，雖然最終射輸12碼出局，但總計3場入6球，進攻表現明顯提升。作為「拖肥糖」一代名將，鄧肯費格遜喺場邊指揮極具台型，佢嘅巨大氣場已經足以鼓動現場球迷同場上球員，呢場愛華頓隨時可以再交出驚喜表現。
狀態飄忽嘅阿仙奴，前線仍有奧巴美揚保持佳態，此子近2次作客正選上陣轟入3球，有佢做急先鋒，「兵工廠」進攻有保證。可惜阿仙奴近7仗都有失波，總入球全開3球或以上，呢場兩軍對攻格，中位數2.5球入球大絕對值得再追。