今晚英格蘭聯賽盃8強曼市雙雄分途出擊，其中曼聯主場迎戰乙組仔高車士打。「紅魔」今季遇強愈強，同佢哋主打反擊戰術有關，對住死守弱旅反而冇乜板斧；高車士打勢擺鐵桶陣，有力頂住半場唔輸，半場和不容錯過。
曼聯今季「劫富濟貧」，之前連贏熱刺同曼城，喺英超對住「新Big 6」4勝1和未輸過，上圈英聯盃亦能淘汰車路士。但佢哋對住主守嘅球隊就冇乜計，原因好簡單，皆因主帥蘇斯克查主打穩守突擊戰術，對住強隊每每憑反擊殺對方措手不及，可惜呢招對弱隊冇得施展，佢哋主攻打陣地戰就老鼠拉龜。連同上屆在內，紅魔近3次英聯盃對非英超球隊，只得2和1負，其中兩次半場互交白卷，加上近4仗主場有3次開半和，遇死守嘅高車士打初段必陷苦戰，半和有計。（周四凌晨4時開賽）
藍月有心衞冕半場大起牛津聯
至於衞冕嘅曼城則作客甲組牛津聯。牛津聯打入8強已超額完成，「藍月」之前兩圈英聯盃並非全出副選應戰，證明有心衞冕，佢哋近5仗作客4次半場大，1.5球嘅半場大不妨再追。
（周四凌晨3時45分開賽）