英超賽程快將完成一半，利物浦喺聯賽榜分別拋離第2、3位嘅李斯特城同曼城10分及14分，爭標形勢大好之餘，亦開始進行引援工作，紅軍剛剛官宣簽入日本球員南野拓實，睇嚟一切順風順水。曼城雖未有放棄，不過屋漏兼逢連夜雨，球隊季初有不少傷兵，影響整體發揮，加上最近盛傳助教阿迪達會離隊執掌阿仙奴，多種不利因素下，本周更加要迎戰第2位嘅李斯特城，絕對係爭標路途關鍵一戰。
攬炒失分必益晒紅軍
若連同周中英聯盃在內，李斯特城已連續11場賽事不敗，氣勢如虹。雖則「狐狸」射手占美華迪上周聯賽中止連場入球走勢，不過呢位英超射手榜「1哥」，過去4場作客聯賽都能帶領球隊贏波，今次作客曼城也誓必挺身而出。
從數據上睇，曼城主場面對「狐狸」一向戰績彪炳，近6次喺主場交手取得5勝。而且「藍月亮」近9場英超賽事中，7場至少入2球。喺前鋒阿古路養傷缺陣下，奇雲迪布尼同史達寧夾檔，相信仍會為李斯特城帶嚟唔少威脅。今場比賽無論李斯特城或曼城都唔肯退縮，不願跌出爭冠行列，但若齊齊失分，笑到最後嘅將會係利物浦，呢一點或許會令雙方更加放手一搏吧！