西甲歇冬前最後一戰，巴塞隆拿主場迎戰下游分子艾拉維斯。周中「國家打吡」賽和皇家馬德里過後，巴塞隆拿球員體力或受到影響，呢場面對活力十足嘅艾拉維斯，想一開波就攻陷艾拉維斯有啲難度，捧返半場和好過。
（Now 632周六晚11時直播）
砌完皇馬兵疲要回氣
巴塞同皇家馬德里呢對西班牙死對頭，今季喺西甲積分榜前列鬥到難分難解，上場「國家打吡」0比0握手言和之後，兩隊同得36分，巴塞僅以較佳得失球暫列榜首，為鞏固榜首優勢，呢場3分志在必得，不過考慮到砌完皇馬要回氣，加上歇冬後歐聯重開，惡戰接踵而來，領隊華爾維迪絕無必要過度催谷球員，或以較穩陣踢法出擊。
艾拉維斯球員平均年齡唔高，球員活力有保證，上半場往往能夠憑着充足體力與敵周旋，今季聯賽對住馬體里體育會同皇家馬德里兩支勁旅，上半場都能踢成0比0平手，加上頭號射手盧卡斯佩雷斯近4仗上陣入得1球，狀態有所下滑，相信艾拉維斯開局都會先做好防守。翻查往績，巴塞過去4次對住艾拉維斯，其中有3次半場同對手打和，預料今場換邊前都係膠着狀態，半場和值得再追。