今晚德甲快車拜仁慕尼黑作客弗賴堡，拜仁想贏波追趕榜首，奈何傷兵太多，面對硬淨嘅主隊唔易食，拜仁讓到兩球風險高，寧吼中位數3.5球細盤。
（Now 670、FOX+、有線651及611台周四凌晨3時30分直播）
弗軍踢出史上最佳開季
拜仁貴為德甲班霸，同總身價只係佢哋8分之1嘅弗賴堡相比本應強弱懸殊，但佢哋現時只多弗賴堡兩分。弗賴堡踢出隊史最佳開季戰績，15輪聯賽後失波仲少過拜仁3球，主場遇強愈強已經5輪不敗，贏萊比錫同和多蒙特都係堅挺賽績，近兩仗主場亦贏波兼保不失。上輪作客0比1不敵哈化柏林，表現其實喺對手之上，教練史特拉希都盛讚防守球員，只係前線未能把握。
拜仁大炒完不來梅士氣好，加上會方宣布會喺一周內決定下半季邊個執教，臨時主帥弗利克要爭取高層信任，球員支持佢當然會盡做。不過拜仁遇上傷兵潮，搞到近期3線作戰只得14至15人可供調用，有主場之助尚可繼續發威，作客就難免飄忽，近4場德甲作客只得1勝，好在查維馬天尼斯可復出鎮守後方，防線畀到較大安全感，但面對硬淨嘅弗賴堡冇大勝把握。