最弗雙雄埋身肉搏
德甲首循環最後一輪，今晚重頭戲係「一哥」RB萊比錫主場迎戰奧格斯堡，亦係兩支近期狀態最火熱球隊對撼，萊比錫贏波基本上就奪得德甲冬季冠軍，奧格斯堡教頭馬田舒密特就話佢哋會竭盡所能打老虎，希望以今場做球隊實力測試指標，喺冇壓力下唔需要龜縮，黑柴深信呢場會係對攻大火併，推介中位數3.5球大盤。
（Now 672、FOX+、有線653及613台周六晚10時30分直播）
萊比錫上輪作客西法倫球場，喺兩球落後下逼和多蒙特3比3，顯示強大韌力同後勁之餘，球隊火力更冠絕德甲，近7輪聯賽非但6勝1和不敗，仲每仗最少都轟入對手3球，至今經過16輪已經入咗45球，仲多過班霸拜仁慕尼黑，前線大紅人迪姆華拿上輪又梅開二度，同樣保持連續7輪有波入，至今以18個入球直追拜仁羅拔利雲度夫斯基。萊比錫目前同慕遜加柏同分，但得失球差領先11球，同日慕遜加柏要作客硬撼兩連勝嘅哈化柏林，要贏超過11球可能性近乎零，所以萊比錫贏波就可以榮登冬季冠軍，加上踢埋今仗就歇冬，眾將當然希望贏出漂亮一仗，同主場球迷一齊慶祝。
迪姆華拿火併菲臘麥斯
不過，萊比錫今仗主勝熱到冇味，亦嫌讓得太多，皆因要面對近期神奇球隊，季初一度淪落尾三嘅奧格斯堡，經過最近6輪5勝1和佳績後，佢哋已經升上聯賽榜中游，而且近3仗亦共取得9個入球，星級翼衞菲臘麥斯連續兩仗梅開二度，弗到爆燈，今輪作客遇強敵根本全無壓力，而且信心十足勢同萊比錫駁火，但主力防守中場蘭尼基迪拉累積5面黃牌要停賽，防線冇咗第一道屏障，難抗萊比錫一眾高速鋒將，黑柴相信好易開出入球騷。