今晚卡塔爾舉行嘅世冠盃4強戰，中北美洲代表蒙特雷硬撼歐聯冠軍利物浦。近年歐洲代表喺世冠盃威到盡，「紅軍」當然想延續壟斷，喺頻密賽程下必想速戰速決殺入決賽，半場客勝好路。
（無綫85台周四凌晨1時30分直播）
中北美洲代表喺世冠盃戰績麻麻，之前4屆得兩屆入4強，但全部都未能躋身決賽，今屆代表墨西哥嘅蒙特雷上圈領先2球下，最終只能險勝東道主艾薩德3比2，防線堅唔穩陣，面對鋒力強橫嘅「紅軍」，半場難頂。
利物浦今季喺英超拋離成條街，歐聯亦順利出線16強，連艾薩德教頭、前巴塞中場大師沙維都讚佢哋攻守轉換太完美，球員完全貫徹主帥高普高強度壓迫嘅風格，令對手難以招架。今次「紅軍」強陣出征，早前受傷患困擾嘅王牌穆罕默德沙拿，近3場亦狂轟4粒，狀態返晒嚟，包括上場淨勝屈福特2比0之役，罕有地用「私家Q」右腳包辦兩粒，弗到咁叫等閒之輩點防範。
歐洲代表近年打晒骰
翻查紀錄，近年世冠盃被歐洲代表壟斷，近14屆歐洲代表11度封王，其餘3次屈居亞軍，即係話近14屆歐洲球隊都能打入決賽。單計近9屆4強戰，歐洲代表都喺法定時間贏波晉級，其中8次上半場已領先，況且利記近5仗有4次半場領先，當然想早早鎖定勝局，下半場換出部分主力為決賽做準備，半場客勝值捧。