同巿打吡戰零舍搏命
今日下午澳職爆發墨爾本打吡，由「2哥」墨爾本城主場硬撼墨爾本勝利。墨城近況極為飄忽，贏輸猶如梅花間竹，防線不穩係致命傷，勝利每逢打吡戰零舍搏命，近6次碰頭只係輸過1場咁大把，仲有得受讓必捧讓球客勝。
（myTV Gold 302、Now 639、有線655及615台周六下午2時直播）
勝利近7場聯賽只得1勝，今季喺本田圭佑、巴巴路西斯離隊之後，無論實力定狀態都不如死對頭墨城。不過學「桂神」黃興桂話齋，打吡戰要將近績、實力、數據等丟埋一邊，因為仇人見面分外眼紅，鬥心、戰意更係勝負關鍵，正所謂「狹路相逢勇者勝」，呢方面勝利稍為秤先，兩軍近6次正面交鋒，勝利取得2勝3和僅1敗，單計作客更獲2勝1和，更顯得佢哋打吡戰特別搏老命，
墨爾本城近況下滑
另邊廂，墨城今季狀態全面復甦，頭5場聯賽豪取4勝1和，前鋒占美麥卡倫更以10球，與FC悉尼嘅方祖並列射手榜榜首，係威係勢。可惜墨城近況變得堅唔穩定，近4場聯賽僅得2勝2負，包括喺領先2球下、最終倒灶以3比4反輸畀弱旅布里斯班獅吼，連同澳足盃決賽慘吞阿德萊德聯4蛋在內，近9場只係得1場冇失波，共失18粒，對於前列球隊嚟講，防線表現實在唔合格，主場迎戰強敵要讓波勁唔抵博，揀番對家要勝利「讓客」更划算。