周六凌晨多場歐洲波上演，又等阿King同大家講講過關心水。打頭陣有意甲費倫天拿主場鬥羅馬，費倫上輪逼和國際米蘭，士氣大振，加上羅馬攻力向來有番咁上下，呢場兩軍有力再演入球騷，中位數2.5球入球大咪走寶。
（myTV Gold 301、Now 638、有線614及654台周六凌晨3時45分直播）
格流追分打劫喜伯年
早前聯賽4連敗嘅費倫，上輪大踢爭氣波，以1比1逼和前列分子國際米蘭，總算搶到寶貴1分。查實今季費倫狀態咁沉，同後防不穩有好大關係，佢哋近8場聯賽都有失波，加上主帥蒙迪拿向來對防守唔算太講究，「紫百合」今場對住有迪斯高同米希達利恩等進攻好手壓陣嘅羅馬，防線隨時再失多幾粒。翻查往績，兩軍近6次交手，4次開3球或以上，中位數2.5球入球大值得再追。
跟住推介蘇超，喜伯年主場挑戰格拉斯哥流浪；格流為追趕榜首些路迪，今場唔可以手軟，加上由謝拉特領軍嘅格流近5仗作客取4勝1和，而且近2次對喜伯年都贏到波，今場格拉斯哥流浪讓1球/球半，上盤值得留意。（周六凌晨3時45分開賽）
最後西甲獨腳戲，伊巴主場迎戰ＣＦ格蘭納達，伊巴近3仗主場全敗兼食白果，今場連進攻核心奧利蘭拿都要坐波監，真係唔使旨意有波入，一於吼實中位數2.5球入球細。
（Now 632周六凌晨4時直播）