森多泊大巴搶分護級
周中意甲焦點戰，「2哥」祖雲達斯作客硬撼森多利亞。祖記老門神保方有望追平馬甸尼嘅意甲出場紀錄，但佢哋今季客場慢熱堅旺半場和，加上森多利亞主帥雲尼亞里戰術極度保守，半場和值得再追。
（myTV Gold 301、Now 638、有線654及614台周四凌晨1時55分直播）
祖記嚟緊周末飛去沙特踢意超盃火併拉素，因此對森多利亞提早今晚舉行；「斑馬兵團」上仗聯賽輕取烏甸3比1，乘住國米和波而追至同分，王牌C朗省兩粒狀態弗番，今場更係老門將保方職業生涯第700場聯賽，由於首席門將施捷斯尼有傷，若祖雲達斯繼續由保方把關，將會係佢第647場意甲賽事，追平AC米蘭名宿馬甸尼所保持嘅意甲出場紀錄。
保方若上陣平馬甸尼紀錄
不過坦白講，最鋒利嘅刀都有生銹嘅一日；保方近年都不時老貓燒鬚，因此祖記亦不能踢得太冒進，而且佢哋今季以慢熱見稱，近10場聯賽有9次半場與對手不分勝負，單計作客成績的話，近10場雖獲6勝3和1負，但全部開晒半場和。
至於日前打吡戰擊敗熱拿亞嘅森多利亞，仍然喺聯賽榜下游苦苦掙扎，佢哋自10月中改由老帥雲尼亞里接手後，為搶分護級踢法變得更加保守，近9場聯賽合共只失9球，其中迎戰羅馬及阿特蘭大兩支前列分子，最終都互交白卷，足證依家森多利亞防線頂得兩嘴，今仗迎戰勁旅祖記，預計雲尼亞里一定照辦煮碗，利用死守戰術博偷雞，捧半場和就更加有利。