周六凌晨德甲獨腳戲，多蒙特作客硬撼賀芬咸。多蒙特自從變陣343陣式後，進攻行雲流水，近5仗比賽共射入16球，造訪賀芬咸必想乘勝追擊，不過「蜜蜂兵團」後防唔算穩陣，尤其客場失球數字偏高，今場轉捧3.5球入球大更上算。
（Now 670、有線651及611台周六凌晨3時30分直播）
早前多蒙特陷於低潮，主帥法夫爾痛定思痛變陣343立即反彈，近5場賽事錄得4勝1和，豪取16個士哥。由馬高列奧斯、杜根夏薩特及查頓辛祖組成嘅新3叉戟非常銳利，今季頗為不順嘅隊長馬高列奧斯，喺前仗聯賽大勝緬恩斯4比0一役更先開紀錄，亦係佢今季首個聯賽客場士哥，依家佢哋打起信心，今場就算作客亦照攻可也。
蜜蜂兵團防線亦唔穩
不過，多蒙特防守能力一般，周中主場對RB萊比錫，喺領先2比0嘅大好形勢下，最終只能踢成3比3完場。「蜜蜂兵團」作客防守表現更曳，今季聯賽客場已失13球，係德甲前9名球隊之中，客戰失球數字最多嘅一隊，因此佢哋今季8場聯賽作客，就有6次開總入球4球或以上。
賀芬咸近況一般，單計近3場聯賽主場不勝，共失10球，包括以眾凌寡仍慘敗予緬恩斯1比5，防守演出叫球迷慘不忍睹，好彩係賀芬咸攻力尚算可以，最近11場全部有波入，預計今場會同多蒙特合演入球騷，捧3.5球大啱數。