往績硬淨靠得住
英超聖誕快車嚟到第2站，周六凌晨狼隊將會主場迎戰「3哥」曼城。力爭衞冕嘅「藍月亮」，今季整體表現不及過去兩季，尤其後防甩漏情況時有發生，相反狼隊近年對住曼城絕對不落下風，呢場有力再搶分，呢仗主隊受讓1/1.5球一於吼實狼隊下盤。
（Now 611及621周六凌晨3時45分直播）
曼城過去兩季都成功喺英超捧盃，不過比起第一季長期佔據積分榜榜首做慣「1哥」，上季「藍月亮」嘅衞冕之路已經顯得崎嶇得多，嚟到今季聯賽失分情況更加嚴重，加上利物浦同異軍突起嘅李斯特城等競爭對手持續強勢，令曼城焗住要追車尾燈，如今係時候要考驗領隊哥迪奧拿同陣中球星嘅韌力。
後防不濟累曼城跌watt
查實曼城靠奇雲迪布尼同貝拿度施華等中場好手壓陣，比賽中控球優勢依然明顯，問題在於佢哋能否應付對手嘅反擊。自從主力中堅拿樸迪季初重傷要長抖後，哥迪奧拿對後防人選一直舉棋不定，防中費蘭甸奴雖然被委以重任頂替中堅位置，可惜呢位巴西球星鎮守防線嘅表現始終畀唔到人信心，曼城近各項賽事近13場僅1次保持到清白身，對住擅長打反擊嘅對手仲經常出現險情，呢場後防隨時再有甩漏。
狼隊近年喺領隊紐奴帶領下，表現夠硬淨，成功穩站積分榜前半版有利位置，甚至有機會再次衝擊歐戰席位。墨西哥射手魯爾占美尼斯聯賽至今已經斬獲7球，包括上仗面對諾域治射入致勝1球，配合邊路快翼艾達馬查奧爾，狼隊火力有保證。回顧往績，狼隊近5次同曼城交手，法定時間內只係輸過1次，今季首循環交手仲曾靠兩次犀利反擊以2比0贏波，可見佢哋對住「藍月亮」特別有心得，呢次主場出擊隨時再有機會搶分，狼隊下盤捧得過。