英超聖誕快車第2站早場戲碼，熱刺主場迎戰白禮頓。熱刺上場以0比2不敵車路士，表現令人失望，呢場繼續主場出擊，知恥而後勇必定大踢爭氣波，對住狀態同實力都麻麻嘅白禮頓唔會手軟，熱刺讓一球上盤好路。
（Now 621周四晚上8時30分直播）
熱刺英超聖誕快車首戰出師不利，面對車路士，一班球員齊齊短路，最終以0比2輸波，比賽中衝動起「升龍腿」襲擊車路士守將魯迪格嘅熱刺前鋒孫興民，仲因此被紅牌被逐，賽後上訴無效要停賽3場，嚟緊有排唔使預佢。
熱刺主帥摩連奴喺同林柏特嘅師徒之戰被技術性擊敗，可以話係顏面盡失，賽後一班熱刺球員肯定畀「寸王」開吹風機省到應一應，但摩佬當初之所以出山，並選擇執教熱刺，肯定係對哈利卡尼、迪利阿里同啱啱續約嘅艾達韋列特等骨幹成員充滿信心，熱刺眾將喺呢位名帥帶領下，進攻效率都有提升，呢場熱刺只要發揮出應有水準，想重回勝軌絕對冇難度。
白禮頓近8作客僅1勝
況且白禮頓上場主場以0比1不敵錫菲聯，無論狀態實力都欠奉，單計作客，白禮頓近8場聯賽作客更只得1勝，其中7次都有失球，防守欠穩成為球隊致命傷，「海鷗」過往4次造訪熱刺全敗，呢場想復仇難度都幾大。相反熱刺近3次快車拆禮物日主場出擊，都贏對手3球或以上，地頭氣勢驚人，呢場有望再下一城，熱刺上盤唔好錯過。