主場不敗華Dee弗爆
拆禮物日最佳節目，當然係睇英超。今晚壓軸戰上演榜首大戰，由「2哥」李斯特城主場對利物浦。利物浦目前打少1場有10分優勢，即使未算坐定粒六，首個英超冠軍都指日可待，不過佢哋剛踢完世冠盃遊完飛機河，嚟緊又要應付快車賽程，條數高普自然識計，今場戰術上肯定比較保守，就算和波都收貨，利物浦讓平半，樂比撐下盤。
（Now 621周五凌晨4時直播）
雖然英超球季只係踢咗接近一半，不過你問10個球迷，9個半都會話英超冠軍係屬於利物浦，即使佢哋已經攞咗世冠盃、歐超盃甚至上屆歐聯，但對利迷嚟講，所有冠軍都唔及英超冠軍嚟得有意義，除咗因為利物浦已29年未攞過頂級聯賽冠軍，更因為近年多次與冠軍擦身而過，對佢哋嚟講英超冠軍比任何錦標都更珍貴。
吸收過上季嘅教訓，高普今季戰術上更謹慎同埋懂得留放之道，例如世冠盃4強對蒙特雷都留有一手，未派最強陣容出戰，不過決賽對法林明高踢足120分鐘，加上要舟車勞頓，難免令球員疲累，而球隊目前有阿歷士張伯倫、祖爾麥迪比、法賓奴泰華利斯及洛夫雲等傷兵，高帥有需要好好保護球員，以免再用佐敦軒達臣客串踢中堅，佢亦深明今場最緊要保持不敗，保持住絕對優勢踏入2020年。
另一邊廂李斯特城今季成績好完全唔係僥倖，即使上仗不敵曼城1比3，但已證明佢哋有能力同任何對手周旋，除「華Dee」占美華迪繼續入球停不了，今季聯賽已射入17球外，其他主力如尼迪迪、占士麥迪臣及蘇恩古都有極佳演出，李城今季喺聯賽主場保持7勝2和不敗佳績，利物浦要作客贏波唔係咁易。
羅渣士領軍倒戈有計
事實上，李城主帥羅渣士始終執教過利物浦一段時間，對紅軍內外都相當熟悉，況且佢過往3次對利物浦，取得1勝1和1負成績，當中包括首循環輸1比2，其實嗰場波李城都輸得相當唔抵，只係補時階段輸球12碼，今次返主場絕對有能力復仇成功。