英超早場曼聯作客屈福特，「紅魔」近期進攻表現有起色，為返前列位置，對住英超包尾大幡屈福特必定強陣出擊，一於熱捧客勝。
（Now 621周日晚10時直播）
曼聯今個聖誕快車，4場聯賽有3場作客，今場造訪屈福特後，嚟緊要喺主場對紐卡素，以及作客般尼同阿仙奴，除咗包艇嘅屈福特之外，其餘3場對手都係中游，同曼聯只有3至4分差距，今輪對住弱旅屈福特，曼聯勢必全力爭勝。
普巴離隊前唔會再上陣
面對連場大戰，曼聯人腳儲備勢必受到考驗，賽前「紅魔」今季長期養傷嘅中場保羅普巴已經復操，本來對曼聯係好消息，點知近日英國《鏡報》爆料，指曼聯有球員同工作人員都認為呢位法國中場已經唔會再為「紅魔」上陣，仲話普巴1月轉會市場重開就會離隊，令人揣測佢喺球隊嘅前途。好彩「紅魔」近期表現有起色，近3仗聯賽取2勝1和，包括先後擊敗熱刺同曼城兩大勁敵，其中拉舒福特個人獨取3球，狀態夠Sharp醒，有力帶領曼聯繼續搶分。
相反積分榜跌落谷底嘅屈福特，雖然早前揾嚟今季第3任主帥尼祖皮亞臣接手球隊，可惜呢位前李斯特城教頭似乎未能為「大黃蜂」度到贏波妙計，上任後2仗僅取1和1敗。最慘係屈福特近5仗只係入得1球，今季聯賽踢到嚟第18輪，總共只入得9球，唔止係英超入球數最少嘅球隊，仲係歐洲5大聯賽攻力最弱嗰隊，咁嘅表現根本冇得同近況回勇曼聯周旋，捧番客勝好過。